২০০১ চনৰ লোকপিয়ল অনুসৰি যিবোৰ জিলাত মহিলাৰ সাক্ষৰতাৰ হাৰ ৫০ শতাংশ বা তাতকৈ কম, সেই জিলাবোৰক সাঙুৰি ৰাষ্ট্ৰীয় সাক্ষৰতা অভিযান প্ৰাধিকৰণে ২০০৯ চনৰ ৮ ছেপ্তেম্বৰত মুকলি কৰিছিল সাক্ষৰ ভাৰত অভিযান নামৰ এক কেন্দ্ৰ প্ৰযোজিত আঁচনিৰ। সেই অনুসৰি অসমৰ ১২খন জিলা ক্ৰমে- ধেমাজি, শোণিতপুৰ, দৰং, বৰপেটা, কোকৰাঝাৰ, বঙাইগাঁও, ধুবুৰী, গোৱালপাৰা, মৰিগাঁও, তিনিচুকীয়া, কাৰ্বি আংলং আৰু হাইলাকান্দিক সাঙুৰি ২০১১ চনৰ পৰা ১৯,২৭,২২৪জন নিৰক্ষৰৰ লক্ষ্য নিৰ্ধাৰণ কৰি সাক্ষৰ ভাৰত অভিযান চলাই থকা হৈছে। এতিয়ালৈকে আমি ৯,৬০,০০০জন নিৰক্ষৰ লোকক সাঙুৰি লৈছো। এইসকলৰ ভিতৰত ৬,৪৫,৩৪৬ গৰাকীয়ে ৰাষ্ট্ৰীয় মুক্য বিদ্যালয় প্ৰতিষ্ঠানে আয়োজন কৰা মূল্যায়ণত উত্তীৰ্ণ হৈ প্ৰমাণ-পত্ৰ লাভ কৰিছে। ভাৰত চৰকাৰৰ নিৰ্দেশনা অনুসৰি সাংসদ আদৰ্শ গ্ৰামৰ ১২,৩৮৪গৰাকী নিৰক্ষৰৰ লক্ষ্য নিৰ্দ্ধাৰণ কৰি সাক্ষৰ ভাৰত জিলাৰ সাতটা লোকসভা সমষ্টিৰ সাতটা গাঁও পঞ্চায়তত সাক্ষৰতাৰ বিশেষ অভিযান আৰম্ভ কৰা হৈছে। গাঁওকেইখন হৈছে- বৰপেটা জিলাৰ কলগাছিয়া, ধুবুৰী জিলাৰ কুছনিমাৰা জোৰদাঙ্গা, হাইলাকান্দি জিলাৰ মাতাজুৰি পাইকান, তিনিচুকীয়াৰ লাংকাছি, কাৰ্বি আংলঙৰ নমাটি, ধেমাজি জিলাৰ কেমি জেলেম আৰু শোণিতপুৰ জিলাৰ ২ নং চতিয়া। ১৪,২৩৬গৰাকী নিৰক্ষৰ লোকক লৈ এই আঁচনি আৰম্ভ হৈছিল ২০১৫ চনৰ ১৫ ছেপ্তেম্বৰত। ২০১৬ চনৰ মাৰ্চ মাহত ১০,৩১৭গৰাকী শিকাৰুৱে মূল্যায়ণ পৰীক্ষাত বহে আৰু তাৰ ভিতৰত ৮,৯৩৬ গৰাকীয়ে সফলতাৰে উত্তীৰ্ণ হৈ প্ৰমাণ-পত্ৰও লাভ কৰিলে। ধেমাজি জিলাৰ কেমি জেলেম, কাৰ্বি আংলঙৰ নমাটি আৰু শোণিতপুৰ জিলাৰ ২ নং চতিয়াৰ ১০০ শতাংশ শিকাৰুৱে পৰীক্ষাত অৱতীৰ্ণ হয়। স্তৰ A আৰু স্তৰ Bৰ অনুৰূপ আঁচনিৰ বাবে ১,৩৪,৭৭৫ গৰাকী শিকাৰুক সাঙুৰি অসম চৰকাৰে এটি প্ৰকল্প প্ৰস্তাৱ ভাৰত চৰকাৰৰ ওচৰত দাখিল কৰিছে
সাক্ষৰ ভাৰত অভিযানৰ আওতাত নপৰা ১১খন জিলাৰ ১৫ বছৰ বয়স আৰু তাতকৈ উৰ্দ্ধৰ নিৰক্ষৰ লোকৰ নিৰক্ষৰতা দূৰ কৰাৰ উদ্দেশ্যে ২০১০ চনৰ জুলাই মাহত ৰাজ্যিক সাক্ষৰতা আঁচনিৰ শুভাৰম্ভ কৰা হয়। এতিয়ালৈকে ৩১,৫০০গৰাকী নিৰক্ষৰক সাক্ষৰ কৰি তোলা হৈছে। এই ৰাজ্যিক সাক্ষৰতা আঁচনিয়ে সামৰি লোৱা জিলাকেইখন হৈছে ডিব্ৰুগড়, শিৱসাগৰ, যোৰহাট, গোলঘাট, নগাঁও, লখিমপুৰ, কামৰূপ, কামৰূপ (গ্ৰাম্য), নলবাৰী, কাছাৰ আৰু কৰিমগঞ্জ।